Tit 1 | WSK | STEP | Ani Paul, Kaem ko ura kari se Jesus Kristus ko apostle. Nu ura ani aisam mu iwita: ani kariimet Kaem noko ma nunga balam mu den gilalong yawara nunga manik se noko nongomang ningi nunguning arukko. Ale nunga sangik se den nunguning ninguru ikimon ale munan diram mu karo tui se,

Titus 1

Den gira

1 Ani Paul, Kaem ko ura kari se Jesus Kristus ko apostle. Nu ura ani aisam mu iwita: ani kariimet Kaem noko ma nunga balam mu den gilalong yawara nunga manik se noko nongomang ningi nunguning arukko. Ale nunga sangik se den nunguning ninguru ikimon ale munan diram mu karo tui se, 2 Kaem ilak tom suen biya bagomonko mu ko iki se bagomonko. Kaem me ta kaweloso nu girakala biya, ali imi me nungam la, nu marak yawara tom suen biya te bagara ko mu nangarukko balam. 3 Ale tom diram nu ko ikiwaram mu te nu ko ikia mu wetang te beteram. Nu anananga Saonga Kari se nanga Kaem. Se nu kota ani noko den apurekko ura mu aisam.

4 Ani tam gawa imi ni Titus bataguru kisisam. Ni Jesus Kristus te aninga kuriang nunguning. Ni ka gemang ningi nunguning aninga iwitata mu ni ago bagasam.

Nanga Ba Kaem, se nanga Saonga Kari Jesus Kristus ilak, nunga nongomang yawara se nunga nongomang lila ni kisimon se te bagerko.

Titus kari saki nunga baluk se supuling ko aratomonko

5 Ani ni Crete tual te am bagerko ma se ka beterem ale tairem mu ko duap iwita: ni ura saki ana me bita sapaman mu ni bita kutuwur, ale ani ka manem iwitata, wonong wonong te kari saki nunga balu se Kris kariimet nunga supuling ko aratomonko.

6 Ni kari bo supuling ko bitarko mu ko munan iwita mu asele ura umutang te bitarko: noko bagara am diram nunguningkiri. Nu nuwus am suwanta. Noko kuriang alo karogo la Kristus ko nongomang ningi nunguning, se munan memek betera kaora mena, nunam nonet nuguring kiara mena tala. 7 Ni ikisam, supuling mu nu Kaem ko ura kuting te aniso. Buta se nu ko bagara kariimet nomotam te memek bo mena, am diram nunguningkiri. Nu numi patowara mena, gomang magara tairate mena tala. Nu yu nana ngualara ko kari mena, nu kari ngil ngual nunga mora ko kari mena, ale nu manga mel biyala taukko ko ikia nukote am mena biya. 8 Nu kariimet iwareng yawarakala nunga bitarso, ale nu munan ningo suen la ko kueso. Nu me ngualoso sipiso. Mena. Nu munan laili se diram la bagurukko mu ko kueso. Ale nu kota ko ikia gomang yawarakala bitarso. 9 Nu den nunguning kasurman mu ninguru ilukuawuso, mu te nu saki alo te diram nunga kausokko terong mam. Ale betela, arikaya den nunguning ko balsan ale den kawel ma balsan mu nunga den sokel menawurokko mu nu terong mam tala. ^{▼▼Titus 1:6-9 Kari supuling nunga munan: 1 Tim 3:2-7.}

10 Kari uwuta mu la diram supuling ko aratomonko. Mu awuk, kariimet suen biya saki alo nuguring kuali kapasan, ale nunga ikia kawel kariimet saki nunga kasursan. Juda kari saki ikia kawel ninguru balsan, ale Kris alo suen la Juda nunga munan karo tumon ale nungumik guang batagarmonko balsan. ^{▼▼Titus 1:10-11 Juda kari saki nongota nunga munan ko sail tagikasan: Gal 2:12; 5:6; 6:15; Col 2:16-23.} 11 Borta ko se ni nunga manaru se kutek mamonko. Mu awuk, nuna den kawel balsan mu te kari saki nunga imet kuriang karogo la nunga nongomang ningi nunguning maguwusan. Bare nononga kausa ura betesan mu ko duap iwita: nuna manga te gimonko se uwutata betesan.

12 Ikia kari bo nu Crete kari alo nunga iwita balam, “Crete alo nuna kawel kuruwim! Nuna kausik memek nungumik gagor ago iwita, am baga se na la nutagu tugu sagomonko.” Se kari uwutata balam mu nu sor bo ko kari mena, nu Crete kari tala wore nu uwutata balam. 13 Se den nu balam mu nunguningta. Se mu ko ni ining nungaru se Kaem ko den diram la karo tumonko. 14 Ale udagi Juda alo nunga dugu duap kawel kawel me ko nodogowa tagimonko, ale kariimet den nunguning nubiring tuman mu nunga nuguring me ikimonko. 15 E kariimet nunga nongomang tuagu nikinang nunguningkiri ago, mu nuna mel suen biya nikinang agotala arigisan. ^{▼▼Titus 1:14-15 Juda kari saki nunga ikia kawel: Col 2:16,20-23; 1 Tim 4:3-5,7. Mark 7:14-23 ago arikko.} Bare kariimet nunga nongomang tuagu memek ago ale nongomang ningi nunguning mena, mu nuna mel suen biya memek ago arigisan. Mu awuk, nunga nongomang tuagu se nunga ikia mu maga saparam. Nuna nunumi balsan ana Kaem ko ikisan masan, bare nunga betera kaora te mu nuna Kaem nubiring tusan. Nuna kariimet memek, Kaem kuring bowa ningi mena, se nuna kilek yawara bo betemonko me terong.

16